Vote 48-a an chak loh chungchangah Shiv Sena-in polling official an khing dawn

Uddhav Thackery kaihhruai Shiv Sena (UBT) chuan Lok Sabha inthlanpui neih zawh takah Mumbai Northwest Lok Sabha biala returning officer chu dan dik loa thil tiah puhin court-ah khin an tum. Polling official hian dan loin an khingpui chu vote 48-a chakah a puang a ni, an ti.

Shiv Sena (UBT) hruaitu, Anil Pranab chuan returning officer, Vandana Suryawanshi chu vote chhiar chungchangah langtlang taka thil kalpui loah a puh a, 'Vote chhiar round 19 hma zawng chuan engkim a fel vek a ni. Mahse Eknath Shinde kaihhruai, Shiv Sena candidate Ravindra Waikar-a'n hma a hruai loh hnuah, RO chuan counting agent-te hnenah data engmah a pe duh tawh lo a, counting table pawh candidate agent-ten an hmuh ve theih lohna tura sawn hlat a ni bawk," tiin, thil dik tawk lo a awm tih rinhlelhawm taka an chet zui thu a sawi. Waikar hi inthlan hma lawk khan Eknath Shinde kaihhruai lamah hian inpein, inthlanah hian Shiv Sena (UBT) candidate Amol Kirtikar chu vote 48 lekin a hneh a ni.

Vote chhiar lai hian counting centre chhungah mobile phone hmang nia sawi chungchangah Vanrai police station-ah FIR thehluh a ni bawk. FIR-ah hian Waikar-a thawhpui leh a chhung hnai, Mangesh Pandilkar leh ENCORE poll-portal operator Dinesh Gaurav hming tarlan a ni. Suryawanshi chuan an officer pakhat mobile phone hman lai midang kuta a lo awm chu thil pawi tak a nih thu leh, hemi chungchangah hian complaint an thehlut tih a sawi ve bawk.