J&K CM hlui Mehbooba Mufti chhuah zalen

Jammu and Kashmir chief minister hlui leh Peoples Democratic Party (PDP) president, Mehbooba Mufti chu thla 14 chhung hren a nih hnuah Thawhlehni khan chhuah zalen a ni ta. 

Kum 61 mi, Mehbooba Mufti hi nikuma sorkar laipuiin J&K special status Article 370 a ṭhiah ni August 5 aṭang khan pawn chhuak thei loin hren a ni. A tirah chuan sorkar facility-ah dah a ni a, a hnuah Cheshma Shashi guest house-ah sawn niin, heta ṭang hian MA Link Road-a government guest house-ah dah a ni. Hemi hnu hian a inah hren niin, a in chu sub-jail ah puan a ni zui bawk.  Man a nih tirh hian Mufti hi CrPC section 107 leh 151 hnuaiah hren a ni a, mahse a hnuah Public Safety Act (PSA)  hmanga  hren zui leh a ni. 

J&K sorkar chuan Thawhlehni khan Mehbooba Mufti hi Public Safety Act (PSA)  hmanga a in lama thla 14 chuang hren a nihna chu a hlihsak ta a ni. 

PSA hnuaia Mufti-a hren a nih chungchangah a fanu, Iltija Mufit chuan Supreme Court-ah habeas corpus petition a thehlut a, court hian vawiinah ngaihtuah a tum a, mahse  ngaihtuah a nih hmain chhuah zalen a ni ta a ni.

Chhuah zalen a nih hnu hian Mufti chuan a audio message a tichhuak nghal a, J&K-in Article 370 a neih let leh theih nan theihtawpa hma a lak tur thu a sawi. He audio-ah hian Mufti chuan Article 370 ṭhiah ni kha black day a nih thu sawiin, J&K mi leh sate chuan an theihnghilh loh thu leh, J&K mite chu dan dik lo hmanga rahbeh an nih thu a sawi.

Articlet 370 ṭhiah a nih chungchanga khin letna hi Supreme Court-ah eng emaw zat a lut a, petition thehluttute chuan he dan ṭhiah a nih dan chu ram danpui kalh niin an sawi. Supreme Court chuan heng  petition-te ngaihtuah tur hian Justice NV Ramana kaihhruai judge panga awmna Constitution bench a siam a, nikum December leh kumin January leh March thla te khan ngaihtuah a ni tawh a, ngaihtuah chhunzawm leh tura dah an la ni. 

Nikum August 5-a  hren dang, chief minister hlui pahnih Omar Abdullah leh Farooq Abullah te chu kumin March thla khan chhuah zalen an lo ni tawh bawk. Omar Abdullah chuan Mufti chhuah zalen a ni ta chu lawmawm a tih thu sawiin, kumkhat chuang zet hren beh a nih dan chu democracy kalphung kalh a ni, a ti. 

CPI(M) leader Mohammed Yousuf Tarigami pawhin Mufti chhuah a ni chu a lawmawm hle tih a sawi a, hemi rual hian nikum August 5 hnu lama man mi eng emaw zat chu hren a la ni tih sawiin, thuneitute chu PSA hnuaia an mi hren dangte pawh chhuah zalen turin a ngen zui nghal bawk.