Eiru-a puh Maha minister a bang

Maharashtra Revenue Minister, BJP hruaitu Eknath Khadse chu eirukna thila inhnamhnawihah puh a nih avangin kar kalta Inrinni khan minister a nihna aṭangin a bang.

Eknath Khadse hi Pune-a sorkar ram chu land deal rules bawh≠chhiain man tlawm takin a nupui leh a makpa hminga leiah puh a ni. A ram lei hi Maharashtra Industrial Development Corporation ram a ni a, acre 3-a zau a ni. A ram hlutna hi cheng vaibelchhe 40 vel nia ngaih a ni a, mahse Khadse hian cheng vaibelchhe 3.75 in a lei nia sawi a ni.

Khadse hi sorkarin man tuma a zawn reng, Dawood Ibrahim nen inzawmna neia puh a ni bawk. Dawood hi Pakistan ramah a biru mek a, Pakistan-a a chenna, Karachi aṭangin Khadse nen hian an inbepawp reng nia hriat a ni.

Eiruk chungchangah hian hmingchhiatna nei mah se, Khadse hi Maharashtra-a BJP hruaitu pawimawh leh thiltithei tak a nih avangin a bang mai duh lo a, mahse BJP national general secretary Ramlal-an CM Devendra Fadnavis-a hnenah banna thehlut tur a hrilh hnuah Inrinni khan a bang ta a ni. CM Fadnavis chuan Khadse-a banna lehkha a dawn chu Governor C H Vidyasagar Rao hnenah thawn nghalin, CM thurawn angin a pawmsak a ni.

Khadse-an minister a nihna aṭanga a ban thu a puan lai hian senior minsiter pahnih Sudhir Mungantiwar leh Vinod Tawde-ten an ṭawiawm a, mahse party office-bearer inlan rawh an awm lo.

CM Fadnavis-a chua Khadse-a puhna hrang hrangte chu high court judge chawl tawh chhuitir a ni dawn tih a sawi.

Hetihlai hian Congress party chuan Khadse chu minister aṭanga ban ringawt lo a, a thuneihna dik lo taka a hman avangin criminal case siamsak a, a thubuai pawh CBI chhuitir an phut. Hei bakah hian firfiak nena inzawmna neiha puh a nih chungchang pawh chhuichian an phut bawk.

Delhi Chief Minister Arvind Kejriwal-a pawhin misual man tuma zawn mek Dawood Ibhahim nena inzawna an neih avangin ram phatsana puhna thubuai siamsak a phut bawk.