Puducherrry CM thar la lut

Puducherry Chief Minister thar atan Union Minister hlui, Congress hruaitu V Narayanasamy chu nimin khan lak luh a ni.

Narayanasamy rual hian Congress MLA panga-te chu minister atan lakluh an ni bawk. Lt Governor Kiran Bedi chuan CM leh minister-te hi Gandhi Tidal-ah rinawmna thu a tiam tir a ni.

Puducherry CM thar hi central-a UPA sorkar ṭum khatnaah khan MoS Parliamentary Affairs niin, UPA sorkar ṭum hnihnaah Minister of State in the Prime Minister Office a lo ni tawh bawk. Puducherry union territorty-ah hian sorkar 18-na a dinna tur a ni a, Narayanasamy hi Chief Minister 10-na a ni. CM zingah hian pali chauhin an term hi an hmang tluan thei a ni.

Kar hmasaa Puducherry Lt Governor thar atana lakluh, Kiran Bedi chuan Pathianni khan thupek tichhuakin, VIP car-ah siren hman a khap. He thupek hian amah zuitu leh pilot car-te pawh a huam tel a ni. Bedi chuan siren chu emergency service, ambulance leh fire engine-te chauhin Puducherry khawlaiah an hmang thei ang, a ti.

Kiran Bedi chuan politician leh sorkar mi pawimawh dangte chu kawngpuia an tlanchhuahin an chuanna motor chu duhsak bik a, traffic-te an tihtawp phah beisei lo turin a hrilh a, eng kawng mahin mipuiten zalenna an neih chu an palzut sak tur a ni lo tiin a sawi. Police-te chu traffic buai lo tur leh, mipuite tana harsatna thlen lo tura traffic duty mamawh zat ang dah turin a ti bawk.