UP sorkarin Mathura buaina chhuak a chhui

Uttar Pradesh sorkar chuan Mathura khuaa sakhaw pawl pakhat, dan loa sorkar rama awmte leh police-te inkara buaina chhuak chungchang chu Pathianni aṭang khan a chhui ṭan. He buaina chhuak vanga hliam tuar mi pahnih an thih belh leh tak avangin thi zat hi mi 29 an tling tawh a ni.

Chief Minister Akhilesh Yadav chuan buaina chhuak vanga thi police officer pa≠hnih, Santosh Yadav and Mukul Dwivedi chhungte hnena ralna, cheng nuai 20 pek tura tih chu cheng nuai 50-ah tihsan a nih thu a sawi a, hei bakah hian an chhungte pakhat ve ve chu sorkar hna pek an ni dawn tih a sawi. Hei bakah hian police leh state sorkar department danga thawkte chuan police officer thi chhungte tan hian cheng nuai 50 ve ve thawhkhawm an tum bawk.

Jawahar Bagh-a park-a inkulhte hi court thupek angin an awmna aṭanga insawnchhuah tir tumin police-te an kal a, mahse anni hian police-te hi hmanrua nen an lo bei let a, buaina nasa tak a chhuak zui ta a ni.

Buaina chhuak chhui danah sorkar hmalakna chu an ring tawk lo tih sawiin, BJP leh BSP chuan CBI emaw, Supreme Court kaihhruai hnuaiah emaw chhuitir an phut. Eptute hian pawikhawihna inhnamhnawiha sawite chu rorellai, Samajwadi Party hruaituten an hum niin an puh.

BJP chuan Jawahar Bagh-a dan loa sorkar hmuna inkulh, sakhaw pawl pakhat, Ramvriksh Yadav-a kaihhruaite chu CM chhungte, PWD minister ni bawk Shivpal Singh Yadav chuan a hum niin an sawi a ni. CM leh PWD minister chu bang turin an phut. BJP chuan Mathura-a buaina thleng chung≠chang chhui tur hian Meerut MP Rajendra Agarwal kaihhruai member pasarih awmna committee an din a ni. BJP committee hian Mathura-a buaina thlenna hmun hi tlawh an tum a, mahse police-ten an lo dang a ni. Hetihlai hian Mathura MP, BJP hruaitu Hema Malini erawh chuan he hmun hi a la tlawh lo nia sawi a ni thung.