BSEB result : Topper-te lakah FIR ziak lut

Bihar School Examination Board (BSEB) buatsaih10+2 examination-a mark pek dan dik tawk lo awm nia sawi kaihhnawihah, Vishun Roy College Director Baccha Rai leh exam-a topper pathumte lakah FIR ziah luh a ni.

Zirlai thubuai siam≠sakte chu Science stream-a topper Saurabh Shreshta leh pathumna Rahul Kumar bakah, Arts stream-a topper Ruby Rai-ten an ni a, Patna-a Kotwali police station-ah FIR hi ziah luh a ni. State sorkar chuan topper-te kalna, Vishun Roy College a recognise-na chu a titawp nghal bawk.

SBEB-in kumina 10+2 exam result a tih≠chhuahah, Arts leh Science stream-a topper-te chu TV-a an kawmnaah an zirlai kaihhnawih zawhna ho tak takte an chhan mumal theih loh avangin result hian rinhlelh a kai phah hle. Arts topper Ruby Rai chuan interview-naah Political Science chu 'Prodigal Science' tiin a lam a, eisiam lam zirna niin a sawi bawk. Arts leh Science-a topper-te hi Vishun Roy College-a kal ve ve an ni.

Zirlai pathumte leh College Director hi IPC sections 420, 465, 467, 468, 471 leh 120 B hnuai≠ah thubuai siamsak an ni a, thiam loh chantir an nih chuan jail-ah tan tir theih an ni ang.

TV-a topper-te interview tihchhuah a nih hnu hian exam result hian sawizui a hlawh nasa hle a, BSEB chuan thil awmdan chhuichiang turin committee a din a, hei bakah hian top 13-te chu re-test nei turin a ti bawk a ni. BSEB-in re-test a buatsaihah hian Science-a topper Saurabh Shreshta leh pathumna Rahul Kumar-te chu an pass zo lo a, hei vang hian an result pawh cancel sak nghal an ni. Arts topper chu re-test neihah hian a inlan loh avangin BSEB chuan June 11-ah nei turin hun a pe leh a ni.

Bihar Chief Minister Nitish Kumar chuan Thawhṭanni khan Education Minister Ashok Choudhary, Principal Secretary (Education) DS Gangwar leh BSEB chairman Lalkeshwar Prasad Singh-te chu kawm≠in, BSEB-in result chhui chiang tura committee a din chu a ṭhiat nghal bawk.

Choudhary chuan meeting zawha chanchin thar lakhawm≠tute a kawmnaah, BSEB committee din chu ṭhiah a nih thu leh, rang zawka thil dik lo awmte chhui chhuah a nih theih nan FIR ziah luh mai chu ṭhaa an ngaih zawk thu a sawi. Board-in a din committee hian thil awmdan hi a chhui chuan hun a duh rei dawn a, chuvangin thil dik titu chhuichhuah chu tihkhawtlai an duh lo a ni, a ti.

CM Kumar chuan exam chungchanga dik lo awm chu police-ten an chhui vek tur thu leh, dik lo taka thil ti te chungah na taka action lak a nih tur thu a sawi.