Mathura case : CBI chhuitir tura ngenna SC-in hnawl

Supreme Court chuan Uttar Pradesh-a Mathura-a police leh dan kalha sorkar ram luahtu, sakhaw pawl pakhat inkara buaina nasa tak chhuak chungchang Central Bureau of Investigation (CBI) chhuitir tura ngenna chu a hnawl. Buaina chhuak vang hian mi 29 an thi a, an zingah hian police officer pahnih an tel.

Delhi BJP thupuangtu, Ashwini Upadhyay chuan Supreme Court-ah hian petition thehlutin, Mathura-a buaina nasa a chhuah hnuah hian finfiahna tur thil tam tam tihchhiat a nih thu a sawi. Uttar Pradesh-a Samajwadi Party kaihhruai sorkar chuan he buaina thleng chungchang hi CBI chhuitir a tum lo a, state investigating agency-ten hna an thawk ṭha bawk si lo niin court-ah hian a thlen a ni.

Petition thehluh ngaihtuahtu, Justice PC Ghose leh Amitava Roy awmna bench chuan petition thehluttu thusawi aṭangin state investigating agency-te thawh ṭhat tawk loh dan finfiahna tur engmah a awm lo niin an sawi a, finfiahna a awm loh avangin court pawh a inrawlh thei lo niin an hrilh. Bench chuan a petition thehluh chu hnukkir leh turin an ngen nghal bawk.

Allahahd High Court thupek angin June 2 khan police-te chuan Jawahar Bagh-a dan loa park-a inkulh, Azad Bharat Vidhik Vaicharik Kranti Satyagrahi pawl intite chu hnawhchhuah tumin an kal a, mahse anni hian police-te hi lo bei letin buaina a chhuak zui ta a ni.