Jat-ten state dangah nawrh tum

Haryana state-a sorkar hna leh zirna-ina quota phuta a thawh hnihna atana nawrh an huaihawt hnuah, Jat hnam chuan state dangah pawh nawrh chhunzawm an tum tih an sawi.

All India Jat Arakshan Sangharsh Samiti (AIJASS) president Yashpal Malik chuan an hnam tana quota phuta an nawrna lantir chu state dangah pawh sit-in protest huaihawt zel an tum tih a sawi a, Thawhṭanni khan Narela (Delhi) bulah nawrh an huaihawt
ṭan a, Uttar Pradesh, Madhya Pradesh, Uttarakhand leh Rajasthan-ahte an chhunzawm leh dawn a ni.

Jat hnam hian quota pek an phut chu tihhlawhtling tura Hayrana sorkar an phut bakah, kumin February thla a nawrh an huaihawt ṭuma Jat mi mante chhuah tur leh, thubuai siamsakte pawh hnukkir turin an phut a ni. Malik chuan, "Nawrhnaa buaina chhuaka thi chhungte chu sorkarin ṭanpuina sum pe bawk rawh se" a ti. February thlaa nawrh huaihawta buaina chhuak vang hian mi 30 an thi a, mi dang 300 chuangin hliam an tuar a ni.

Pathianni aṭang khan Jat hnam hian nawrh thawh hnihna hi Haryana-a state 13 ah an nei ṭan leh a, buaina liantham chhuak a awm lo. Sorkar chuan buaina chhuak thei venthawn thilah venghimtu ṭhahnem tham tak a duty tir a, district hrang hrangah June 8 thlenga zu hralh khapna dan hman a ni bawk.