PM-in Bihar-ah Nalanda University campus a hawng

Prime minister Narendra Modi chuan nimin khan Rajgir, Bihar-a Nalanda University campus thar a hawng a, thing ṭiak a phun nghal bawk.

Campus thar hawnnaah hian external affairs minister S.Jaishankar, Bihar governor Rajendra Arlekar, chief minister Nitish Kumar, deputy CM pahnih - Samrat Choudhary leh Vijay Sinha bakah, ram 17 ambassador-te pawh an tel.

Prime Minister hian campus thar a hawn hma hian Rajgir-a Nalanda hmun hlui, UNESCO world heritage site chu a tlawh hmasa a ni. Kum zabi 5-na hunlaia ding tawh, Nalanda University hi khawvel huapa zirna hmun lar tak ni ṭhiin, India bakah China, Tibet, Persia leh Asia ram dang aṭangin an pan khawm nasa ṭhin hle. Kum zabi 12-naah he hmun hi Bkhatiyar Kilji chuan beiin a tichhia a, Nalanda library pawh a hal chhe vek a ni. Hetih lai hian library-a hian lehkhabu maktaduai 9 vel dawn a awm a, heng lehkhabute hi thla thum chhung vel an kang nia sawi a ni.

PM-in a hawn tak, university campus thar hi Nalanda hmun hlui bulah hian sak niin, kum 2016-a kha tih laia India President Pranab Mukherjee chuan lungphum phumin, kum 2017 aṭang khan sak ṭan niin, Rs vbc 1,749 sengin an sa a ni. Academic block pahnih a awm a, classroom 40 awmin zirlai 1,900 vel awm theihna tur a ni. Seat 300 awmna auditorium pahnih, zirlai 550 awm theihna tur hostel, international centre, faculty club, sports complex leh mi 2,000 lenna amphitheatre te a awm bawk. 'Net Zero' Green Campus atana duan niin solar plant, water treatment facility leh water recycling system-te dah a ni.