Canada Parliament-in Khalistani firfiak zahna hlan; India Embassy-in a chhang let ve nghal

Canada Parliament chuan June 18 khan Hardeep Singh Nijjar thah a nih champha vawi khatna pualin, amah hriatrenga leh zahna lantirin ngawi renga dingin hun an hmang.

Hardeep Singh Nijjar hi India sorkarin India aṭanga inlakhran duhtu, Khalistani firfiak tia a puan a nih avangin, Canada Parliament-a amah zahna hun hman a ni hi a ngaimawh hle. Parliament-a hun an hman tuk, nimin khan Vancouver-a Indian Embassy chuan India-in firfiaka chetna chu a dodal zel dawn a ti a, June 23 hian kum 39 liam taa firfiak-in Air India flight 182 (Kanishka) a bomb avanga pawisawi lo nunna chan, mi 329-te hriatrengna hun chu hman a ni dawn a, India mite chu tel vek tura sawm an ni tih a puang zui ve nghal a ni.

Kum 45 mi, Nijjar hi nikum June 18 khan Birtish Columbia, Canada-a Guru Nanak Sikh Gurdwar kawtah thah a ni a, India sorkarin firfiak list a siamah a tel a ni. A rual hian a thurualpuite nia sawi, India mi pali pawh thah an ni ve bawk. Canada hian an ram chhunga Nijjar thah a nih chungchangah hian India agent-ten inrawlhna an nei niin a ngai a, hei vang hian India leh Canada inkar boruak pawh a chhiat phah viau a ni.