Delhi-ah kum 12 chhunga khaw lum ber zan thleng

Delhi khawpuiah Thawhlehni zan khan kum 12 chhung zan lama a lum ber ṭum thlengin, khaw lum lam hi 35.2 degree Celsius a tling.

Hemi hmaa zan lama a lum ber record chu kum 2012 June thla vek niin, 34 degree Celsius a ni. Delhi leh National Capital Region-ah hian khaw lumin ziaawm lam a la pan lo a, heat stroke leh chauh vangin damdawi-in hrang hrangah damlo an tam hle. Doctor-te chuan kum upa lam leh taksa lam chak lo zualte chu pawn chhuak tam lo turin thurawn an pe.

Delhi health minister Saurabh Bharadwaj chuan May thla khan Delhi sorkar hnuaia damdawi-in hrang hrangah chuan khaw lumin a hmeh chauhte enkawlna turin khum pahnih reserve a nih tur thu leh, LNJP Hospital-ah khum panga ruahman a nih tur thu a lo sawi tawh a ni.

Khaw lum nasa tak an tuar mek karah, Delhi khawpui hian tui indaihlohna an tawk chho mek bawk. Delhi water minister Atishi chuan nimin khan prime minister Narendra Modi hnenah lehkha thawnin, khawpui chhunga tui indaihlohna an tawh mek chinfelna tur ngaihtuah sak an nih thuai loh chuan June 21 aṭangin tiam chin awm loin chaw ngheia nawrh a tum thu a sawi. Atishi chuan Haryana-in Delhi khawpui tana tui a pek tur ang zat a pek chhuah duh loh vangin tui harsatna hi a la kiang thei lo tih a sawi. 'Haryana hian Delhi tan tui, MGD 613 a pek tur chu Thawhlehni khan MGD 513 chauh a pe a ni. MGD khat hi mi 28,500 tana tih a ni a, Haryana hian mi nuai 28 chuangte hman tur tui a pe tel duh lo tihna a ni," a ti. Haryana sorkar hnenah pawh vawi tam tak ngenna hi an thlen tawh tih a sawi.