Patna HC-in Bihar caste based quota hnawl

Patna High Court chuan Bihar sorkarin backward classes - EBC, SC leh ST puala zirna in leh sorkar hna laknaa 65% quota a siam chu a hnawlsak.

Chief minister Nitish Kumar kaihhruai sorkar hian nikum November thla khan caste-based quota siamna tur hian dan a siamṭha a, backward class tana reservation 50% dah chu 65% ah a tisang a ni. Mahse High Court-ah he dan siam khinna petition hi eng emaw zat thehluh niin, chief justice K Vinod Chandran kaihhruai division bench chuan a ngaihtuah a ni.

Petition thehluttu pakhat aiawha ding, Ritika Rani chuan state sorkarin reservation law a siamṭhat chu ram danpui kalh a ni, a ti. Court hian petition lutte a ngaihtuah hnuah, state sorkarin dan a siamṭhat, Bihar Reservation of Vacancies in Posts and Services (Amendment) Act, 2023, leh Bihar (In Admission in Educational Institutions) Reservation (Amendment) Act, 2023 te chu a hnawlsak ta a ni.