Ram pumah khaw lum vanga thi mi 110 tling tawh

Union Health Ministry chuan ram pumah khaw lum avanga thi chu mi 110 an tling tawh a, harsatna tawk enkawl ngai mi 40,000 chuang an awm tawh bawk niin nimin khan a tarlang.

Uttar Pradesh chu khaw lum lutuk tuar nasa ber state niin, mi 36 in an thih phah tawh a; Bihar, Rajasthan leh Odisha-ten an dawt. National Centre for Disease Control (NCDC) in National Heat-Related Illness and Death Surveillance data a siamah, June 18 bikah khan khaw lum vanga thi hi mi paruk an awm.

Ram chung hmar lam leh khawchhak lam chuan khaw lum hi an tuar zual a, sorkar laipui pawhin hospital hrang hrangte chu khaw lum vanga harsatna tawk, damlo te enkawlna tur special unit siam turte pawhin a lo hriattir tawh a ni.