Delhi tana tui tam zawk pek phutin Minister Atishi-in chaw ngheiin nawrh huaihawt

Delhi water minister Atishi chuan a lo sawi lawk tawh angin, Delhi tana tui tam zawk pek phutin nimin aṭang khan tiam chin awm loin chaw a nghei ṭan.

Minister Atishi hian khaw lum zual zel karah Delhi khawpuiin tui indaih lohna nasa tak a tawk meka,Haryana chu Delhi tana tui tam zawk pe turin a phut a, a thil phut hi tihsak a nih loh chuan chaw ngheia nawrh huaihawt a tum thu a lo sawi tawh a ni.

Nimin khan Atishi hian Delhi chhim lama Bhogal-ah nawrh hi a huaihawt ṭan a, chief minister Arvind Kejriwal nupui Sunita Kerjiwal leh Aam Aadmi Party (AAP) hruaitu dangten an ṭawiawm. Sunita Kejriwal hian Tihar Jail-a tang mek, a pasal Arvind Kejriwal-a thu thawn a chhiar chhuak a, Kejriwal chuan Atishi thil nawr chu a hlawhtlin ngei a beisei thu a rawn sawi. CM chuan TV lamah Delhi mipuiten khaw lum tak kara tui lama harsatna an tawh dante a lo hmuh chuan a ti na hle tih a sawi bawk. "Delhi hian a ṭhenawm state aṭangin tui hi a dawng ṭhin a, tuna khaw lum lutuk avanga harsatna kan tawh mekah hian an theih anga min puih pawh kan lo beisei a ni. Mahse hetiang karah hian Haryana chuan Delhi tana a tui pek ṭhin chu a titlem ta zawk a ni," a ti. State pahnihah hian party hran ve ve in sorkarna siam mek mah se, tui chungchang chu politics khelh nana hman chi a ni lo tiin Haryana-a BJP sorkar chungchang chu a sawi zui bawk.

Atishi chuan Delhi mipuiten Haryana aṭanga an tui dawn tur zat dik tak an dawn hma chu chaw ngheiin a nuar dawn tih a sawi. Kar hnih liam ta chhung khan Haryana hian Delhi hnena a tui pek tur, 613 MGD aṭangin ni khatah gallon mtd 100 tling lo zelin a pe a, hei vang hian khawpui chhunga cheng mi nuai 28 velin an tui dawn tur an dawng thei lo niin a sawi.