Delhi HC-in Kejriwal-a bail phalna a dan sak

Delhi High Court chuan Tihar Jail-a tang mek, Delhi chief minister Arvind Kejirwal-a bail-a chhuak tur chu, jail aṭanga chhuahtir a nih hma lawkin Enforcement Directorate (ED) petition thehluh vangin a dang leh.

ED aiawha ding, additional solicitor general (ASG) SV Raju chuan trail court-in Kejriwal-a bail dilna a lo phalsak chu dodalin, thutlukna an siam dan chu a fel hlel a ni, tiin justice pahnih - Sudhir Kumar Jain leh Ravinder Dujeda awmna bench a hrilh. "Bail cancel theih dan hi kawng hnih a awm. Thu dik zawk awmte ngaihtuah lo a, thu rintlak loh zawkte ngaihtuah a nihin bail cancel theihna a ni," tiin trial court chuan thu dik tawk lo hmanga thutlukna a siam vangin bail a phalsak pawh a cancel thei a ni, a ti.

High Court hian Kejriwal bail phalsakna hi a dan sak rual hian, ED petition thehluh pawh chu ngun taka enfiah tur a ni tiin, an thu thlente hi ngaihtuah a nih hma chuan trial court-in bail chungchanga thutlukna a siam chu hman theih a ni lo ang, tiin a tarlang.

ED hian Delhi liquor policy-a sum tihchingpen kaihhnawihah Kejriwal hi thubuai siamsakin an man a, Tihar Jail-ah a tang mek a ni.