Zirlai pawl hrang hrangten lungawi lohna lantir

Zirlai pawl hrang hrangte chuan NEET exam-a thil fel tawk lo awm leh, UGC-NET exam cancel a nih chungchangah lungawi lohna lantirin, Delhi-a union education minsiter Dharmendra chenna in kawtah leh, education ministry office bulah nawrh an huaihawt.

Nawrh huaihawtnaah hian SFI, AISA, Democratic Students’ Front (DSF), Krantikari Yuva Sangathan (KYS), Congress hnuaia NSUI member-te an tel a, RSS hnuaia Akhil Bharatiya Vidyarthi Parishad (ABVP) pawhin Delhi Univeristy north campus leh Jawaharlal Nehru University-ah lungawi lohna an lantir bawk. Zirlai pawlte hian exam pahnih buatsaihtu, National Testing Agency (NTA) chu chhui chian an phut a ni.

Supreme Court chuan NEET-UG 2024 exam-a tlingte hnenah counselling/seat allotment kalpuina tur tikhawtlai tura ngenna thehluhte chu a hnawl thung. Counselling hi July 6 aṭang hian neih ṭan a ni ang. Hei bakah grace mark an paihsak, candidate 1,563-te chu June 23 hian exam ṭhat tir an ni leh dawn bawk a, hei pawh hi Supreme Court chuan a tihtawp sak duh lo bawk a ni. UG-NET exam cancel a nih hnuah, NEET-UG 2024 exam pawh cancel ve tura ngenna hi Supreme Court leh High Court-ah eng emaw zat a lut tawh a ni. Petition ṭhenkhatah chuan Central Bureau of Investigation (CBI) chhui chian tir tura ngenna pawh a awm bawk. NEET-UG exam chungchang petition lutte chu SC hian July 8 aṭangin a ngaihtuah dawn chauh a ni.