Sorkarin NTA Director General a thlak; NEET-PG exam hun a sawn

NEET-UG leh UG-NET exam-ah a thil fel hlel a awm vanga buaina a awm mek karah, heng exam buatsaihtu Nation Testing Agency (NTA) director general Subodh Kumar Singh chu sorkar laipui chuan thlakin, a aiah IAS officer Pradeep Singh Kharola a ruat.

Appointments Committee of the Cabinet chuan NTA DG additional charge la tura Kharola ruat a nihna chu Inrinni khan a pawm a ni.

Union educatoin minister Dharmendra Pradhan chuan competitive exam - NEET leh NET-a thil fel tawk lo awm nia sawi chungchangah NTA hruaitu chu chhui chian a ni dawn niin a sawi. Mahse hemi hma hian education ministry chuan ISRO hotu hlui, K Radhakhirshnan kaihhruai member pasarih awmna panel chu NTA kaltlanga exam neite langtlang leh dik tak kalpui a nih theihna tura hma la turin a lo hriattir tawh bawk.

NTA hotu thar atana ruat Pradeep Singh Kharola hi 1985-batch IAS officer, Karnataka cade a ni a, Indian Trade Promotion Organisation-ah Chairman leh Managing Editor a ni mek. Union Ministry of Civil Aviation-ah Secretary niin, kum 2001-2024 chhung khan Union Ministry of Tourism-ah director a lo ni tawh bawk a ni.

NEET-PG exam hun sawn

NEET-UG exam-a thil fek tawk lo a awm nia sawi a nih hnuah, nimina NEET-PG exam tur chu fimkhur thilah sawn hlat a ni.

Union health ministry chuan Inrinni khan NEET-PG exam hun hi sawn a nih thu puangin, exam neih hun tur hi an la ruat ṭha leh dawn a ni. Exam sawn a nih tur hi exam neih hun hma darkar 12 chauh a awm tihah an puang. NEET-PG exam hi health ministry hnuaia autonomous body, National Board of Examinations in Medical Sciences (NBEMS) in a buatsaih ṭhin a ni.