Vawiinah Lok Sabha session ṭan dawn

18th Lok Sabha session hmasa ber chu vawiin hian ṭan a ni dawn a, session ṭan ni hian Lok Sabha member atana thlan tharte rinawmna thu tiam tira lak luh an ni ang.

Rajya Sabha session chu June 27-ah ṭan a ni dawn bawk a, hemi ni hian president Droupadi Murmu chuan Parliament House joint sitting-ah thu a sawi ang.

President Murmu chuan Lok Sabha pro tem speaker atan BJP hruaitu, Bhartruhari Mahtab a ruat dawn a, ani hian member tharte hi a la lut ang. Lok Sabha Speaker thar tur hi June 26-ah thlan a ni dawn a ni. President chuan Kodikunnil Suresh (Congress), T.R. Baalu (DMK), Radha Mohan Singh leh Faggan Singh Kulaste ( BJP ve ve) leh Sudip Bandyopadhyay (TMC) te chu Lok Sabha member tharte lakluhnaa pro tem Speaker pui tur hian a ruat bawk.

Leader of Opposition tur a la chiang lo

18th Lok Sabha-a hian Leader of Opposition turin Rahul Gandhi hming sawi rik ni mah se, thutlukna a la siam lo.

Congress Working Committee chuan Rahul Gandhi hi Leader of Opposition ni tura an duhna resolution pawh a pass tawh a, mahse Gandhi hian a la pawm lo a, thutlukna siam tura hun pe turin a ngen. Hetih lai hian LoP atan hian Gandhi bakah Manish Tewari, Kumari Salja leh Guarav Gogoi hmingte pawh sawi rik a ni bawk.

Lok Sabha LoP hi eptu party lian ber aṭangin dah a ni ṭhin a, mahse LoP post chang tur hian party hian Lok Sabha-ah a tlem berah MP 55 an neih phak a ngai a ni. BJP a sorkar hnu, kum 2014 aṭang khan eptu party mal zingah hetiang zat MP nei pha hi an awm loh avangin kum 2014 aṭang khan Lok Sabha hian LoP a nei tawh lo a ni. Congress party hian 2014 inthlanah khan seat 44 neiin, 2019-ah seat 52 a nei a, LoP hi a chelh pha lo a ni. Mahse kumin inthlanah erawh Lok Sabha seat 99 a neih tak avangin, LoP hi an chang thei dawn ta a ni.