UP sorkarin a hnuaia thawkte phalna la loa media platform-a inlan khap

Uttar Pradesh sorkar chuan sorkar hnathawkte tana kaihhruaina thar siamin, sorkarin phalna a pe a nih loh chuan media platform lama inhnamhnawih a khap. He khapna hi a bikin officer-ten an sawisel zui nasa hle.

Additional Chief Secretary, Appointment and Personnel, Devesh Chaturvedi chuan thuchhuah siamin, sorkar hnathawkte chu social media, print, electronic, digital leh broadcast media, radio-ahte pawh phalna nei loin sorkar thutlukna siam chungchang an sawi, post leh ziahte a khap a ni. Thuchhuahah hian UP Government Servants’ Conduct Rules, 1956, Section 3(2) pawh tarlang telin, sorkar hnathawkte an khawsak dan leh hna thawhna kawngah sorkarin thupek a siamte chu an zawm tur a ni, tih a ni.

UP sorkarin kaihhruaina thar a siam hnuaiah hian sorkar hnathawk zingah newspaper, magazine leh digital platform-a article, opinion leh comment ziak duhte chuan state sorkar thuneitute hnen aṭangin phalna an lak hmasa phawt a ngai tawh dawn a ni.