TN-ah zu chhe in vanga thi 56 tling tawh

Tamil Nadu-a Kallakurichi district-a zu chhe in vanga thi chu Pathianni thleng khan mi 56 an tling tawh. Mi dang 159 chu damdawi-in hrang hrangah enkawl mek an la ni bawk.

Zu chhe in vanga thi zinga mi 32 hi Karunapuram khaw mi an ni a, Kallakurichi, Madhavacheri leh Seshasamudram-ah mi eng emaw zat an thi bawk. CB-CID chuan zu ṭha lo supply-tu nia hriat, Govindaraj leh a nupui Vijaya, a unaupa Damodaran te an man tawh a ni.

State assembly leh Madras High Court-ah pawh zu chhe in vanga thihna thleng chungchang hi sawi chhuah a ni. Eptu pawl, All India Anna Dravida Munnetra Kazhagam (AIADMK) chuan sit-in protest an huaihawt a, he thil thleng hi ngaihzam mai chi a ni lo tih an sawi. High Court-ah pawh AIADMK legal wing secretary Is Inbadurai chuan petition a thehlut bawk. High Court division bench chuan sorkarin hma a lak dante hriat an duh thu sawiin, June 26 hian petition thehluh hi an ngaihtuah ang.