Lok Sabha member tharte lak luh an ni: INDIA-in "Save Constitution" protest an nei

18th Lok Sabha session hmasa ber chu nimin khan neih a ni a, Lok Sabha member atana thlan thar ṭhenkhat chu rinawmna thu tiam tira lakluh an ni a, vawiinah chhunzawm a ni ang.

Session ṭan hma hian eptu pawl, INDIA MP-te chuan Parliament complex-ah "Save Constitution" protest neiin, Constitution copy te an keng a ni. He hunah hian Congress, Samajwadi Party, Trinamool Congress, DMK bakah eptu party dang member-te an tel. Eptu pawl hruaitu zingah Congress president Mallikarjun Kharge, party leader Rahul GAndhi, TMC hruaitu Sudip Bandyopadhyay, DMK hotu TR Ballu te pawh an tel a ni. Constitution leh democracy humhim tura an beih zel tur thu an sawi. Rahul Gandhi chuan prime minister Narendra Modi leh home minister Amit Shah-ten an duh dan ang anga Constitution an chin phar an remti dawn lo tih an sawi.

President Droupadi Murmu chuan Pro-Tem Speaker atan BJP MO, Bhartruhari Mahtab a la lut a, hemi hnu hian Pro-Tem Speaker kaihhruaina hnuaiah MP tharte hi lak luh an ni. Prime minister Narendra Modi chu a la lut hmasa ber a, member 280 la lutin, vawiinah member 260 lak luh an ni leh ang.

Pro-Tem Speaker ruat chungchangah hian eptu pawl leh rorel lai pawlte an inep leh a ni. Tihdan phungah chuan Pro-Tem speaker atan hian Parliament member zinga senior ber ruat a ni ṭhin. Mahtab hi MP term sarih a nihna a ni a, hetih lai hian amah aia senior, MP term riatna hmang mek, Kerala MP Kodikunnil Suresh a la awm. Congress chuan Suresh aia Mahtab ruat a nih avang hian BJP chu na takin a sawisel a ni. Lok Sabha Speaker thlan hma chuan Pro-Tem Speaker hian session hi a kaihruai dawn a, Speaker leh Deputy Speaker thlan pawh a kaihhruaina hnuaiah neih a ni ang.