NEET-UG : CBI team-in Patna-a EOU office thleng

Medical entrance exam, NEET-UG chungchanga thil dik tawk lo awm an chhuina kal zelah, nimin khan Delhi-a Central Bureau of Investigation (CBI) team chuan Patna, Bihar-a Economic Offences Unit (EOU) an thleng.

Sorkar laipuiin CBI kuta a pek hma khan EOU hian NEET-UG buaina chungchang hi an chui a, mi 18 an man tawh a ni. CBI officer-te hian EOU aṭanga an case chhui tura pawimawhte an la chhawng a ni.

June 23 khan CBI hian NEET-UG buaina kaihhnawihah hian FIR an ziak lut tawh bawk a, a dang pawh an la ziah luh belh zel rin a ni. CBI officer chuan thil dik lo tihnaa a mawhphurtu bera puh, Samastipur-a mi Sikander Prasad Yadendu, Danpur Town Council-a junior engineer lakah chuan disproportionate assets (DA) case ziah luh a ni dawn tih a sawi.

NEET-UG re-exam-ah candidate 48% inlan lo

NEET-UG exam-a grace mark an paihsak, candidate 1,563-te chu Supreme Court thupek angin Pathianni, June 23 khan exam ṭha leh tura tih an ni a, mahse he hunah hian candidate zinga 750, 48% te an inlan lo.

Re-exam hi Chhattisgarh, Gujarat, Haryana, Meghalaya leh Chandigarh-ahte neih a ni. NEET-UG exam, May 5-a neihah heng zirlaite hi hun an hloh hliahkhuhna atan gracemark pek an ni. Mahse sawibuai a awm hnuah an gracemark pekte hi cancel sak leh an ni a, exam ṭhat leh emaw, an grace mark tel loa an original score ang pawm chu an duh zawk an thlang thei a ni.

High-level panel ṭhukhawm

National Testing Agency (NTA) buatsaih competitive exam-a thil dik tawk lo thleng chungchangah, NTA kalphung leh exam kalpui dan ṭha zawk ngaihtuah turin nimin khan union education ministry hnuaiah high level panel an ṭhukawm.

Education Ministry hian Indian Space Research Organisation (ISRO) hotu hlui, K Radhakrishnan kaihhruai member pasarih awmna panel chu NTA kaltlanga exam neihte langtlang leh felfai taka kalpui a nih theih dan ngaihtuah turin a lo hriattir tawh a ni.

Panel hian exam kalphungah siamṭhat ngai awmte rawtna siamin, data security lam tihṭhat dan te, NTA kalphung siamṭhat dan turte an sawiho ang. Panel member-ah hian AIIMS-Delhi director hlui Randeep Guleria, University of Hyderabad Vice-Chancellor BJ Rao, IIT-Madras Department of Civil Engineering-a professor emeritus K Ramamurthy, People Strong co-founder leh Karmayogi Bharat board member Pankaj Bansal, IIT-Delhi Dean of Student Affairs Aditya Mittal leh Education Ministry Joint Secretary Govind Jaiswal-te an tel.