Delhi Minister-te'n PM hnenah ngenna thlen

Delhi khawpuiin tui indaih lohna avanga harsatna a tawh mek chinfel dan ngaihtuahpui thuai tura ngenin, Delhi-a rorellai Aam Aadmi Party (AAP) sorkara cabinet minister-te chuan prime minister Narendra Modi hnenah ngenna an thlen.

Nimin khan Delhi cabinet minister-te hian press conference neiin, Haryana state-in Delhi khawpui tana tui a pek tur zat a pek chhuah hma chaw ngheia nawrh huaihawt an tum a, water minister Atishi chuan ni li chaw a nghei tawh a, a hriselna pawhin a tuar ṭan tawh niin an sawi.

Minister-te hian Atishi nawrh huaihawtna, Jangpura-a Bhogal-ah meeting neiin, an harsatna tawh mek sutkian dan ngaihtuah tura Prime Minister hnenah lehkha thawn an rel a ni.

Environment minister Gopal Rai chuan Delhi Lt Governor VK Saxena leh officer zawng zawngte chu Haryana in a tui pek luh zat data pawh en vek turin an ngen tih a sawi. Delhi chuan tui a chan tur ang zat chu a chang ngei tur a ni, a ti. Haryana-a BJP sorkar hian Delhi khawpui tana tui a pek tur zat hi a pe kim duh lo a, hei vang hian Delhi khawpui hian khaw lum nasa tak an tuar mek karah tui indaihlohna nasa tak an tawk mek bawk a ni.