Lok Sabha Speaker atan Om Birla thlang: Congress-in LoP atan Rahul Gandhi ruat

27th June, 2024

18th Lok Sabha session hmasa ber neih mekah, nimin khan Lok Sabha Speaker atan BJP candidate, Om Birla chu voice vote hmanga thlan a ni.

Kuminah hian kum eng emaw zat hnua a thlen ṭum khatna atan, Lok Sabha Speaker post hi NDA candidate, BJP MP Om Birla leh INDIA candidate, Congress MP Kodukunnil Suresh ten an chuh a ni. Prime minister Narendra Modi chuan Speaker atana Birla thlanna tur motion hi a pu lut a, Suresh tan motion hi Shiv Sena (UBT) MP Arvind Sawant chuan a pu lut ve bawk.

Voice vote hmanga 18th Lok Sabha Speaker atana Om Birla thlan a nih hnuah PM Modi leh Congress leader Rahul Gandhi-te chuan lawmpuna chibai bukin, Speaker Chair lamah an hruai zui a ni.

PM Modi chuan a ṭum hnihna atana Speaker chair luah tura thlan tlin a ni leh chu House pumpui aiawhin a lawmpui thu Birla a hrilh a, kum nga chhung a kaihhruaina hnuaia an kal leh tur chu an nghakhlel hle tih a sawi. A hlim hmelte chuan House pumpui boruak a ti nuam ṭhin tiin a sawi bawk.

Rahul Gandhi pawhin eptu pawl hrang hrang leh INDIA aiawhin Speaker thar chu lawmpuina a hlan bawk a, eptute chuan a hnathawhna kawngah theihtawpin an pui zel dawn a, eptute tan pawh House-ah aw an chhuah theihna a siamsak zel a ring nghet tlat tiin a sawi.

Speaker thar Om Birla hi kum 1962-a piang niin, MP term thumna a hmang mek. 17th Lok Sabha-ah khan Lok Sabha Speaker a lo ni tawh bawk.

LoP atan Rahul Gandhi

Congress party chuan Lok Sabha-a Leader of Opposition (LoP) atan Rahul Gandhi ruat a nih thu Thawhlehni zan khan an puang.

INDIA bloc hruaituten Congress party president, Mallikarjun Kharge chenna ina meeting an neih zawhah, party general secretary in-charge of organisation, KC Venugopal chuan Congress Parliamentary Party (CPP) Chairperson Sonia Gandhi-in Pro-tem Speaker Bhartruhari Mahtab hnenah, LoP atana Rahul Gandhi an thlan thu hi a hriattir nghal a ni, a ti.

Congress Working Committee (CWC) chuan June 8 khan Rahul Gandhi hi LoP charge la tura ngenna resolution pawh an lo pass tawh a, mahse Gandhi hian a ngenna hi a pawm mai lo a, hun pe turin a ngen a ni. Thawhlehni khan Leader of Opposition charge la tura ngenna hi a pawm ta tih an sawi.