Delhi Minister-in chaw nghei a ti tawp

Delhi water minister Atishi-i'n Haryana sorkarin Delhi khawpui tana tui a pek chhuah tur zat a pek duh loh avanga lungawi lohna lantir a, tiam chin awm loa chaw ngheia nawrh a huaihawt chu a hriselna dinhmun ṭha lo avangin Thawhlehni zan khan a ti tawp.

Minister Atishi hian tui indaih lohna avanga harsatna tawk mek, Delhi khawpuiin a tui chan tur ang zat a chan theihna tura central-a BJP sorkar leh Haryana-a BJP sorkar nawr nan chaw ngheiin a nuar a, ni nga chaw a nghei hman. Mahse a blood pressure leh sugar level nasa takin a tlahniam a, hei vang hian damdawi-inah dah luh a ni. Damdawi-in a luh hnuah pawh Atishi hian Haryana-in Delhi tui chan tur zat a pek chhuah hma chuan chaw a nghei chhunzawm zel tur thu a sawi a, mahse doctor-ten a dinhmun chu a hlauhawm thu sawia an nawr hnuah, Thawhlehni zan khan a chaw nghei hi a ti tawp ta a ni.