Bihar School Education Board chairman a bang

Bihar School Education Board (BSEB) chairman Lalkeshwar Prasad Singh chu nimin khan a hna aṭangin a bang.

Tunhnaia BSEB-in 10+2 examination a buatsaih result tihchhuaha thil fel tawk lo a awm nia hriat a ni a, hei vang hian Science leh Arts stream-a topper-te leh an kalna, Vishun Roy College director-cum principal Amit Kumar lakah FIR ziahluh a ni.

FIR thehluh a nih hnuah topper-te leh principal hi IPC section 420 (cheating), 465 (forgery), 467 (forgery of valuable security), 468 (forgery for purpose of cheating), 471 (using as genuine a forged document or electronic record) leh 120B (criminal conspiracy) hnuaiah thubuai siamsak nghal an ni. State Crime Investigation Department chuan exam-naa thil dik tawk lo awm nia sawi hi an chhuizui mek a ni.

Arts leh Science stream-a pakhatna, Ruby Rai leh Saurabh Shresta te kawmna, an zirlai an hriatchian loh zia lanna video tihdarh a nih hnuah BSEB chuan kawng hrang hrangin sawisel a tawk hle. Thawhlehni khan Special Investigation Team (SIT) chuan BSEB chairman hi thu zawt≠fiahin, a camputer leh hard disk-te an laksak a ni. Hengte hi Class 12 result siam dan chung≠changa thu chiang zawk an hriat theihna turin mithiamten an zirchiang dawn a ni.

Police official pakhat chuan Science leh Arts exam buatsaiha topper-te answer sheet hi thlak sak an ni a, paper danga chhanna dik awmsa chu thehluh sak an ni zawk a ni, a ti. STI team hian Science stream-a topper Shresta chu thu zawhfiah tumin Vaishali district an pan tawh a ni.

Class 12 result-ah thil fel tawk lo a awm nia rinhlelh a nih avangin Science-a pakhatna leh pathumna chu BSEB chuan re-test a neih tir leh a, hetah hian an fail ve ve a, hei vang hian an result pawh cancel sak nghal an ni. Arts topper chu a inlan hman loh avangin June 11 hian re-test neih tir tum a ni bawk.

Patna police team chuan topper-te kalna Vishun Rai College zirlaite answer sheet an endik a, Rajendra Nagar Boys High School pawh an dap bawk a, exam laia duty leh paper check-tu te list pawh an la khawm bawk. Police-te hian Vishun Rai College pawh an dap bawk a, mahse he institution neitu Baccha Rai erawh chu an hmu zo lo. Baccha Rai hi RJD hotu Lalu Prasad Yadav nena inpawh ṭha tak nia sawi a ni a, mahse Lalu Prasad chuan hei hi phain, a hriat ngai a nih loh thu a sawi thung.