Sorkarin paper leak a chhui dawn, a dik lote hrem an ni ang : President Murmu

President Droupadi Murmu chuan nimina Parliament joint sitting hmaah thu a sawi a, National Democratic Alliance (NDA) sorkar term thumnaa presidential address a neihna hmasa ber a ni.

President Murmu chuan MP thlan tharte lawmpuina a hlan a, Election Commission chu 2024 Lok Sabha inthlan hlawhtling taka a buatsaih avangin a fak bawk. NDA sorkar hnathawh hrang hrangte sawi langin, Budget thar pawh ram tana hmathlir nei ṭha tak a ni dawn tih a sawi.

18th Lok Sabha session hmasa ber hi Thawhṭanni, June 24, 2024 aṭang khan neih ṭan niin, nimin aṭang khan Rajya Sabha session ṭan a ni ve bawk.

Tun hnaia ram pum huapa buaipui, National Testing Agency (NTA) buatsaih exam-a paper leak chungchang chu President chuan sawi chhuakin, sorkar chuan he thil hi a chhui dawn a, dik lo taka thil titute chu a hrem ngei dawn a ni, a ti. Ram chhunga ṭhalaiten hmathlir ropui tak tak an neih a, hengte hi an tihhlawhtlin theihna tur boruak ṭha sorkarin siam ngei a tum a ni, a ti. Sorkar hna lakna emaw, examination buatsaihah emaw dik tak leh langtlang taka thil kalpui a ni ang, tiin a sawi.

Sorkar thar hnuaia budget hmasa ber pharh turah, ram tana chhinchhiah tlak, economy lama thutlukna pawimawh tak hmuh a ni dawn tiin President chuan joint sitting hmaah a sawi bawk. Ram mipuite beisei ang ngeiin, hmasawnna hna chu chak taka thawh a ni dawn a ni, a ti.

Nimina Parliament joint sitting hmaa President thusawi hi Delhi-a rorellai, Aam Aadmi Party (AAP) chuan an boycott. Hei hi an party hotu leh Delhi chief minister Arvind Kejriwal man a nih vang a ni.

RS-a Leader of House atan JP Nadda ruat

Rajya Sabha session 264-na ni hmasa ber, nimina neihah BJP national president leh union healh minister, JP Nadda chu Leader of the House atan ruat a ni a, Piyush Goyal a thlak a ni.

Chairman Jagdepp Dhankar chuan Leader of the House atana Jagat Prakash Nadda ruat a nih thu hi a puang a, member-ten dawhkan bengin an lo lawm a ni. He thu a puan lai hian prime minister Narendra Modi pawh a awm.

Rajya Sabha-a Leader of the House Piyush chu Lok Sabha member atana thlan tlin a nih tak avangin, BJP hian a hmain a thlaktu atan JP Nadda an thlan thu hi puangin, Rajya Sabha pawh an lo hriattir tawh a ni. Nadda hi BJP national president a nihna hi tun thla hian a tawp tawh dawn a, mahse kumina state pali ten assembly inthlan an neih dawn avangin a term hi an pawhsei a rinawm.