US-in India-a sakhaw inleh khapna dan pung a ngaimawh

US chuan India rama sakhaw inleh khapna dan hmang pung zel leh, hnam leh sakhaw tlem zawkte huatna chawk chhuak thei zawnga thu sawi leh sakhaw biakna hmun pawimawh tihchhiat a ni ṭhin chu a ngaimawh hle.

Nilaini khan US state department chuan annual report on international religous freedom a tlangzarh a, he hunah hian India ram chungchang hi US secretary of state Antony Blinken chuan a sawi a ni. Report hian India rama sakhaw zalenna chungchang pawh hi kum 2023 khan US official-te chuan India rama an thawhpuite bulah pawh an lo sawilang tawh niin a tarlang.

Secretary of state chuan, "India ramah hian sakhaw inleh khapna siam an pung zel a, inhuatna chawk chhuak zawnga thu sawi, sakhaw dang betute in leh sakhaw hmun pawimawh tihchhiatte a pung a ni. Hetih lai hian khawvel hmun dangah chuan sakhaw zalenna humhim tur hian theihtawp an chhuah mek thung," a ti.

India ramah state 10-in sakhaw inleh khapna dan khauh tak an hmang mek niin 2023 Report on International Religious Freedom-ah hian tarlan a ni. Kristian leh Muslim ṭhenkhat chu he dan hnuaiah hian man an ni tih a sawi bawk.