PM-in Mexico a thleng

Ram panga tlawha zinchhuah mek, Prime Minister Narendra Modi-a chuan nimin zing khan US aṭangin Mexico a thleng.

PM Modi hian Mexico President Enrique Pena Nieto kawmin, ram pahnihte inlaichinna chung≠changte a sawipui dawn a ni. Modi hi kum 1986 hnua India PM zinga Mexico ram tlawh hmasa ber a ni. Ram panga a tlawh tur zingah a hnuhnung ber a ni.

Mexico hi Latin America ram zingah India independence pawmpuitu ram hmasa ber niin, ram pahnihte hian kum 1950 aṭang khan palai an intir tawn tawh a ni. Mexico chuan India-in Nuclear Suppliers Group (NSG) member nih duhna chu a thlawp tih President Nieto chuan joint meeting an neihah a sawi. PM Modi pawhin Mexico President hi lawmthu hrilhin, energy security lamah Mexico chu India thawhpui ram pawimawh tak a nih thu a sawi. Ram pahnihte chuan thawhdunna nghet leh ṭha zawk nei tura thawhdun zel an remti bawk.

President Nieto hian meeting an neih zawhah PM Mod hi restaurant-ah chaw chhun a eipui nghal a ni. PM hi nimin vek khan a rawn haw nghal a ni.

Modi hi kar kalta Inrinni khan ram panga - Afghanistan, Qatar, Switzerland, US leh Mexico

tlawh tur hian a zinchhuak a ni. Ram panga a tlawhte hi trade, energy leh security lama thawhdunna ṭha neihpui dan kawng a sawipui bakah, May 12-a India-in NSG member nih dilna a thehluh chu thlawp turin a sawm a ni.