Bihar exam thubuaiah mi panga man

Bihar Police-te chuan an state-a 10+2 result kaihhnawiha thubuai ziahluh a nih hnuin mi panga an man tawh a, hetihlai hian merit list dik tawk lo chungchanga inhnamhnawiha puh Bihar School Examination Board (BSEB) chairman Lalkeshwawr Prasad Sigh leh Bishun Rai College principal Bachha Rai-te chu an la bibo thung.

Ningani-a police-ten an mante hi Government Boys High School Rajendra Nagar principal-cum-centre superintendent Vikeshwar Prasad Yadav, Mathematics teacher Sanjiv Kumar Suman, Inter Council-a section officer Shambhu Nath Das leh assistant Ranjit Kumar Mishra leh, GA Inter College-a principal-cum-centre superintendent Shail Kumari-te an ni.

Exam result tihchingpen chungchang hi state sorkarin a ruat, Special Investigation Team (SIT) in a chhui mek a, Patna SSP, Manu Maharaj-an a ho a ni.

Manu Maharaj chuan, "Mi pahnih bibo mekte hming pawh hi FIR-ah hian ziahluh tum a ni a, thil dik lo tihnaa an inhnamhnawih tih finfiahna rintlak tak pawh a awm a ni" a ti. Exam neih taka answer sheet tihchingpen leh mark pek dan dik tawk loah BSEB chairman hi a inrawlh ngei tih finfiahna a awm niin a sawi.

BSEB chairman bank accout hi enfiah a ni dawn a, hei bakah hian a phone record bakah, a chhungte phone record zawng zawng pawh enfiah vek a ni ang.

Police chuan Ningani khan Baccha Rai-a chenna, Vaishali a mi chu an dap a, a laptop leh diary-te an lak bakah, a inah hian admir card leh answer paper ṭhenkhat pawh an man tel bawk. 10+2 exam result tihchhuah takah Arts leh Science stream-a topper te kha Baccha Rai-a college-a kal an ni.