RS inthlanah BJP in hma a sawn

State pasarih-ah Rajya Seat 57 hnawh khahna turin kar kalta Inrinni khan inthlan buatsaih a ni.

Seat 57 ah hian seat 30-ah chuan chuhtu awm loin candidate-te an tling nghal a, seat 27-ah vote thlak niin result pawh puan nghal a ni.

Inthlan buatsaihna hi Uttar Pradesh, Karnataka, Madhya Pradesh, Uttarakhand, Jharkhand, Rajasthan leh Haryana state te an ni. Rajya Sabha member thlanna-ah hian MP leh MLA-ten vote an nei a, member 1 aia tam thlan tur a nih chuan MLA-te hian an thlan duhte chu a indawt danin an rem thei a, an vote thlak hma hian, an mi duh zingah tling tura vote hmuh ngai zat hmu tling an awm tawh chuan an vote thlakna tur pawh an sawn leh thei a ni.

Congress party chu Rajya Sabha-ah party lian ber nih chhunzawm zel m ah se, BJP hi seat 27 inthlanah 11-ah a chak avangin an inthlauhna pawh a zim sawt hle.

Uttar Pradesh-a seat 11-a inthlan buatsaihah state-a rorellai, Samajwadi Party chuan seat pasarih lain, Bahujan Samaj Party in seat hnih a la a, BJP leh Congress party chuan seat khat ve ve an la. Congress party hruaitu hlun, Kabil Sibal chu UP aṭang hian thlan tlin a ni.

Haryana state-ah chuan BJP-in a thlawp, independent candidate Subhash Chandra a chak. Mahse inthlanah hian Congress MLA 14 vote chu pawm sak an nih loh avangin sawizui a hlawh hle rin a ni.

Karnataka-ah Union Minister Nirmala Sitharaman, Congress hruaitu Jairam Ramesh, Oscar Fernandes leh KC Ramamurthy-te an tling.

Rajasthan-ah chuan seat pali-te chu BJP candidate-ten an la vek a, an zingah hian union minister Venkaiah Naidu leh OP Mathur-te an tel.

Madhya Pradesh-ah BJP in seat hnih lain, Congress party thlawp independent candidate-in seat khat a la bawk.

Uttarakhand-a seat awm chhun chu Congress candidate Pradeep Tamta-an a la a ni.