NEET chungchanga in auh buai vangin July 1 thleng atan Lok Sabha inkhawm titawp

18th Lok Sabha rorel inkhawm neih mekah, nimin khan rorellai leh eptu lam member-te chu tun hnaiah NEET-UG examination neih taka thil fel tawk lo awm chungchangah nasa takin an inau buai. Hei vang hian Lok Sabha inkhawm hi July 1 thleng atan tihtawp a ni.

Nimina rorel inkhawmah hian eptu MP-te chuan NEET scam leh paper leak chungchang an sawi chhuak a, Rule 267 hnuaiah hemi chungchang hi sawiho an phut. Hetih lai hian Speaker Om Birla chuan eptute chu ngawi rih turin a ngen a, mahse eptu lam hi an au bengchhen chhunzawm zel avangin rorel inkhawm chu July 1, 2024 chawhma dar 11-a chhunzawm turin a titawp ta a ni.

Rajya Sabha rorel inkhawmah pawh eptuten NEET paper leak chungchangah BJP kaihhruai NDA sorkar chu beiin, sawiho an phut bawk. Mahse Chairman-in eptute thil phut hi a remtih loh avangin, leader of opposition Mallikarjun Kharge hoin House laiah eptu MP te an chhuak khawm a ni. House leader thar, JP Nadda thusawi pawh eptute hian zawhna hrang hrang nen an lo au buai a ni. Rorel thei loa member-te an au buai chhunzawm avangin inkhawm tihtawp lailawk a ni a, mahse chawhnu dar 2-ah chhunzawm leh a ni thung.

Eptu ṭangrual pawl, INDIA chuan karleh Thawhṭannia session chhunzawm hunah, House pahnihah NEET chungchang chu an aupui leh dawn tih an sawi.

Rahul Gandh-a mic off sak a ni - Congress

Congres party chuan nimina Lok Sabha-a Leader of Opposition, Rahul Gandhi-a'n NEET paper leak chungchang a sawi laiin a microphone chu off sak a ni tih an sawi.

Rahul Gandhi-a'n Lok Sabha speaker Om Birla hnena microphone hman a dil lai video chu Congress hian X-ah an dah lang a ni. Speaker Birla hian MP-te microphone chu a off sak loh thu leh, off sak thei pawh a ni lo tih a sawi a ni. Hei bakah President thusawi chungchang sawi ho tur an ni a, a bak thil dang sawi chu record a ni dawn lo tih a sawi bawk.