Delhi Airport Terminal 1 chung a chim

Delhi-ah ruah sur nasa tak avangin nimin zing khan Delhi-a Indira Gandhi International Airport Terminal 1 chung ṭhenkhat a chim a, mi pakhat thiin mi dang paruk an hliam.

Ministry of civil aviation chuan chhiatna thleng vang hian Delhi Airport Terminal 1 aṭanga flight chhuak tur leh, chawhnu dar 2 hma lama chhuak tur chu tihtawp a ni a, chawhnu dar 2 hnu lama mi erawh terminal dang pahnihah sawn an ni. Union minister of civil aviation Ram Mohan Naidu Kinjarapu chuan chhiatna thlenna hmun hi a tlawh nghal a, terminal structure-te chu uluk taka enfiah a nih tur thu a sawi. Minister hian terminal chung chimin a delha thi chhungte hnenah zangnadawmna, Rs nuai 20 pek a nih tur thu leh, hliam tuar mi parukte chu Rs nuai 3 ṭheuh pek an nih tur thu a puang nghal bawk.

Official-te chuan in chung leh a beam hi an chim nia sawiin, terminal pick-up leh drop area-a car pali ding chu an delh niin an sawi. He thil thlen hun hi zing lam dar 5 vel nia sawi a ni.

Delhi-ah hian khaw lum tak leh tui indaih loh avanga harsatna a tawh hnuah, Ningani aṭang khan ruah nasa taka surin, thli a thawk tel bawk. Darkar 24 chhunga ruah tla hi 228 mm a tling a, kum 1936 hnuah a tam ber ṭum a ni. Khawpui chhung hmun tam tak chu tui a tling a ni. Tilak Nagar, CR Park leh Bharat Mandapam-a kawngpuite chu tuiin a chim a, tui tlingin harsatna a thlente ngaihtuahin high-level meeting neih a nih tur thu Delhi urban development minister Saurabh Bharadwaj chuan a sawi.