Vawiin aṭangin Amarnath Yatra hmang ṭan dawn

Hindu sakhaw zuitute hun pawimawh, Jammu and Kashmir-a an hmun thianghlim tlawha kum khata vawi khat hun an hman ṭhin, Amarnath Yatra chu vawiin aṭangin ṭan a ni leh dawn ta. Biakzina kal tur batch hmasa ber chu nimin khan Jammu and Kashmir lieutenant governor, Manoj Sinha chuan Yatri Niwas base camp aṭangin a vai liam.

Kumina Amarnath yatra hi ni 52 awh tur niin, he hun hmanga kalte chu leilung tibawhhlawh lo tur leh, zu in lo leh mei zu lo turin yatra buaipuitu, Shri Amarnath Shrine Board (SASB) chuan a ngen. SASB hian yatra hmanga kalte tana an tih tur leh tih loh turte a tichhuak a ni.

Amarnath cave shrine hi Kasmir chhim lam, Lider Valley tawp lam meter 3,888-a sanga awm a ni. A awmna hmun a san avangin SASB chuan he hmun tlawha kal turte chu thawmhnaw lum keng ṭha turin an chah a, khua hi 5 degree Celsius hnuai lamte a ni tih sawiin, kaihhruaina an siamte pawh zawm ṭha turin an chah.

Kumina hian yatra kal tuma inziaklut hi nuai 3.50 chuang an tling. Cave shrine panna kawng pahnihah hian ei siamna hmun 125 siam a ni a, hei hi volunter 6,000 chuangin an vil a ni.