LS inthlan hnua a hmasa ber atan PM-in Maan Ki Baat hmang

Prime minister Narendra Modi chuan thla tina radio programme a hman ṭhin, Maan Ki Baat chu nimin khan a hmang. Hei hi kumina Lok Sabha inthlanpui neih zawh hnua a hman hmasak ber a ni.

Nimina radio kaltlanga ram mipuite hnena thuchah a sawiah, Prime Minister chuan 2024 inthlanpui chu khawvela inthlan lian ber a ni tiin, 'Khatianga inthlan lian tham kha khawi ramah mah an la buatsaih lo. Inthlanpuiah khan mi vaibelchhe 65 chuangin vote an thlak a ni," a ti. Election Commission leh inthlan buaipuitu dang zawng zawng pawh a lawmpui thu a sawi bawk.

Inthlan kaihhnawih thil avangin thla rei vak lo Mann Ki Baat chu tih chhuah ni lo mah se, a boruak erawh a cham reng a ni, a ti. A hun hman hnuhnung ber, February 25 niin, inthlan avangin tihtawp a ni ta rih a ni. 'February aṭanga kan lo nghahhlelh tak chu kan thleng leh ta," a ti.

Prime Minister hian International Yoga Day lawm chungchang, khawvel huapa Indian film-te chet ṭhat na, ram ngaw chereu tur venna kawnga hlawhtlinna leh thil dang hrang hrangte a rawn sawi. Tribal freedom fighter - Veer Sidhu leh Kanhu zahna a hlan a, anni pahnih kum 1885-a Santhal hoin British awpna an dodalnaa an hruaitute an ni. Prime Minister chuan Paris Olympics neih tura tel tur infiammite duhsakna a hlan bawk a, ram mipuiten Paris Olympic-ah an chet ṭhat hle an beisei tih sawiin, infiammite cho phurna tur hian mipuite chu 'cheer4Bharat' hastag hmang turin a chah bawk.

Mann Ki Baat hi kum 2014, October thla aṭangin Prime Minister hian a hmang ṭan a, topic hrang hrang sawiin, sorkar hmalakna leh hlawhtlinna sawi chhuahna atan te, ram kaihhnawih thil pawimawh leh mipuite fuihna thute a sawi ṭhin. He programme hi Indian language 22 leh dialect 29 bakah foreign language 11 in tih chhuah ṭhin a ni.