Army chief thar General Upendra Dwivedi

General Upendra Dwivedi chuan nimin khan Indian Army sipai maktaduai 1.3 te hotu, Chief of the Army Staff (COAS) charge chu General Manoj Pande hnen aṭangin a la ta. Gen Dwivedi hi Indian Army chief 30-na a ni.

Lt Gen Dwivedi hi Jammu and Kashmir Rifles ami niin, kumin February thla aṭang khan Vice Chief of Army Staff in a awm a ni. Infantry officer niin, operation lamah tawnhriat nei ṭha tak a ni. Param Vishisht Seva Medal, Ati Vishisht Seva Medal bakah General Officer Commanding-in-Charge (GOC-in-C) commendation card pathum a lo dawng tawh bawk.

Indian Army hotu thar hi Madhya Pradesh mi a ni a, Sainik School Rewa-ah a kal ṭhin. Kum 1981, January thlaah National Defence Academy a zawm a, 1984 December 15 khan Jammu and Kashmir Rifles 18th Battalion-ah dah a ni. School a kal lai aṭangin infiamna lam ti thei tak a ni a, NDA leh IMA pawh che ṭha chhoin, Physical Training-ah pawh 'Blue' award a dawng a ni. Sipaia a ṭan hnuah pawh physical traning course-ah gold medal a la bawk a ni.