Amarnath Yatra 2024 : A ni khatnaah mi 13,000 in holy cave tlawh

Hindu sakhaw zuitute tana hun pawimawh, Amarnath Yatra chu Inrinni liam ta aṭang khan neih ṭan a ni a, kumina yatra neih hian ni 52 a awh ang.

Yatra ni hmasa ber, Inrinni khan biakzina kal mi 13,000 chuan Kashmir chhim lama sakhaw hmun pawimawh, holy cave shrine an tlawh hman a ni. He hmun thianghlim an tlawh ṭhin hi meter 3,880-a sanga awm a ni.

Amarnath shrine hi kawng hnih aṭangin a pan theih a, Anantnag lam aṭangin Nunwan-Pahalgam route km 48-a thui leh, Ganderbal aṭangin km 14-a thui Baltal route lamah a kal theih a, mahse a kawng tawi lam hi a awih hle thung.

Prime minister Narendra Modi leh union home minister Amit Shah-te chuan yatra-a kalte hi duhsakna an hlan a, Amit Shah chuan India culture-ah Yatra hi a pawimawh hle tih sawiin, he hun hmanga kalte himna chu sorkarin a ngai pawimawh hle tih a sawi. Hei vang hian venhimna lam pawh an uluk hle. Jammu-Srinagar national highway-ah Central Armed Police Forces (CAPFs) ṭhahnem tak dah an ni a, Srinagar-Baltal leh Qazigund-Pahalgam route-ah dah an ni bawk.

South Kahsmir-a Anantnag district-a local officer pakhat chu yatra ṭan hnuah a duty-na hmuna a awm loh avangin suspend a ni. Anantnag deputy commissioner, Sayeed Fakhrudin Hamid chuan Pahalgam Naib Tehsildar Ovais Ami chu phalna nei loin station a chhuahsan a, Amarnath yatra neih mek chu a tihbuai phah a, hei vang hian suspend a ni tih a sawi.

Yatra-a kalte hriselna lam pawh ngaih pawimawh a ni a, kum 70 chunglam leh naupang kum 13 hnuai lam bakah, naupai lai thla ruk tling tawh chin pawh Yatra-a hian kal phalsak an ni lo.