Maha-ah Congress, Shiv Sena (UBT) leh NCP (SP) thawk ho dawn

Maharashtra assembly inthlan awm turah, National Congress Party (Sharad Pawar), Uddhav Thackeray kaihhruai Shiv Sena (UBT) leh Congress party te an thawk ho dawn. Assembly inthlan hi October thla hian neih a ni ang.

NCP (SP) hotu, Sharad Pawad chuan nimina press conference a neihah Shiv Sena (UBT) leh Congress party nena an thawh ho tur thu hi a puang a, Lok Sabha-a eptu ṭangrual pawl, INDIA hnuaia an thawh hona chu vawn nun chho zel an tum a ni.

NCP(SP), Congress leh Shiv Sena (UBT) hian Maharastra-a kum 2019, November thla aṭanga kum 2022, June thlaa sorkar paihtlak a nih hma zawng khan Maha Vikas Aghadi (MVA) ṭangrual sorkar an siam a ni. Mahse Shiv Sena MLA tam zawk helin, Uddhav Thackeray kaihhruai MVA sorkar hi an paihthla a, Shiv Sena pawh an phel zui a ni.

Party pathumte hian an thawh ho tur thu tifel tawh mah se, seat insem dan tur erawh an la rel lo a, an ngaihtuah thuai tur thu Pawar chuan a sawi. Chief minister candidate pawh party pathumnten an rel ho dawn tih sawiin, an thawh honaah chuan prime minister Narendra Modi leh a kaihhruai sorkar duh lotute chu tel vek turin a sawm bawk.