Covid-19 kai zinga 74.30% an dam leh tawh

India ramah hripui kai an tam tawh hle a, chuti chung chuan enkawl dam pawh an pung zel. Ministry of Health and Family Welfare-in nimina report an tihchhuahah chuan hri kai hmuh chhuah thar 68,898 an awm leh a, darkar 24 chhunga dama puan mi 62,282 lai an awm bawk a, 983 an thi leh bawk.

Hri len ṭantirh aṭanga nimin thleng khan India ram chhung hmun hrang hrangah hri kai hmuhchhuah 29,05,823  an awm tawh a, heng zinga 6,92,028 hian hri an la kai mek a, 21,58,946 chuan dampui leh tawhin 54,849 chuan an thihpui thung.

Enkawl dam tawh rate hi 74.30% a tling tawh a, thihpui rate pawh tlahniam hret hret zelin 1.89% a ni tawh.

India ram hi khawvela hri kai tam ram pathumna a la nih chhunzawm zel a, ni khata hri kai hmuh chhuah thar zatah erawh hri kai tam ber ram US leh a dawttu Brazil khum chho tawhin ni 17 chhung chu heng ram pahnih ai hian nikhata hri kai hmuh chhuah thar an tam tawh zawk. Brazil-ah hian India ram aiin hri kai nuai 6 chuangin an la tam zawk a, mahse tun ang renga hri kai an pung chak a nih chuan Brazil ai hian India ram hi a sang thuai dawn a ni.

Indian Council of Medical Research (ICMR) chuan nimina report an tihchhuahah darkar 24 chhungin sample 8,05,985 an endik leh tih an tarlang a, hei nen hian nimin thleng khan Covid-19 sample 3,34,67,237 an endik tawh. 

India hian nikhatah sample maktaduai khat tal endik tumin hma a la mek a, nimin piah lamahte kha chuan darkar 24 chhungin sample nuai kua chuangte an endik a ni. Covid-19 sample endikna tura laboratory pawmpui pawh neih belh zelin nimin thleng khan laboratory 1,504 lai a pawmpui tawh a, heng zinga 978 hi sorkar laboratory a nih laiin 526 chu private laboratory a ni thung.

Mumbai civic body leh Indian Council of Medical Research (ICMR) chuan kum upa lamin hripui an kai lohna turin BCG vaccine a hman theih em tih an zirchiang dawn. 

BCG vaccine hi a nihna takah chuan naupangin tuberculosis an vei lohna tura hman a ni ṭhin a, viral infection vanga thawk lama harsatna awm theite a veng thei nia tarlan ni bawkin hemi a nih avang hian kum upa lamte'n hri an kai lohna tura invenna atan a hman theih em tih an zirchiang dawn a ni.

Mumbai-ah chauh an enchhin dawn lo a, ramchhung hmun danga Covid-19 hri leng hluarna hmunahte pawh enchhin an tum bawk. Mumbai bikah hi chuan damdawi-in pathumah enchhinna an kalpui ang.