Bihar election: RJD-in voter-te life insurance siamsak phut

Bihar assembly inthlan chu kumin October -November hian neih tum a ni a, mahse ram chhunga hri leng mek avangin inthlan kalpui dan turah political party hrang hrangten rawtna an siam.  

Election Commission chuan political party-te hi rawtna siam turin a lo ti tawh a, heng rawtna an thehlut aṭang hian poll panel-in inthlan kaihhruaina a siam dawn a ni. RJD chuan hripui leng mek avangin inthlan buatsaih hi an duh loh thu an sawi a, inthlan hi kaltlangpui a nih chuan vote thlaka chhuakte zingah coronavirus kai an awm a nih chuan sorkarin life insurance a siamsak tur a ni, an ti. RJD hian Election Commission hnenah hri leng laka an state dinhmun a ziaawm hma chu inthlan hi sawn rih tur pawhin ngenna an lo thehlut tawh a ni. 

AIMIM chuan polling staff-te zawng zawng chu coronavirus test neihsak vek turin a rawt bawk. Congress party chuan party hrang hrangten public meeting an buatsaihah hri laka himna tur ruahmanna siam belh a ngai tih an sawi. Sorkarin hri darh tur venna atana kaihhruaihna a siamte public meeting-a telten anlo bawhchhia a nih pawhin, meeting buatsaihtu leh political leader-te chu mawhphurhna lak tir an ni tur a ni lo, a ti. 

Eptu  party hrang hrang, Congress, RJD leh AIMIM chuan inthlana vote thlakna atan electronic voting machine (EVM) hmang lo a, ballot paper hmanga vote thlak an duh thu an sawi. Hripui len mek laia EVM lo hman chu vote thlak turin hmeh zel a ngaih vangin mi tam takah hri a darh phah thei a ni tiin, ballot paper hman chu a him zawk tih an sawi.  

BJP chuan EC-a rawtna a thehluhah, inthlan tur inbuatsaihna atan hian political party-te chu mipui nitin mamawh an sem phalsak turin a ti. Heng thil semte  hi voter-te thamna leh leina tumna anga  ngaihsak loh a rawt bawk.