Sept 10 aṭangin Parliament monsoon session ṭan ring

Covid-19 leng vanga hun rei tak tihkhawtlai tawh, Parliament monsoon session chu September 10 aṭanga ṭan theih rin a ni. 

Monsoon session hi dan pangngaiah chuan July thla laihawlah neih a ni ṭhin. Mahse hripui leng vanga sorkarin lockdown a puan avangin neih theih a ni rih lo a ni. Session hi eng chen nge neih tur tihchian a la ni lo a, mahse kar li chhung a awh dawn nia sawi a awm. Lok Sabha leh Rajya Sabha rorel inkhawm chu ni khatah nei dun loin, a ni inkar thlaka neih a ni ang. Parliament member zawng zawngte chu an mobile phone-ah Aaroyga Setu app dah vek tura tih an nih bakah, screening neih sak zel an ni ang. 

Official-te chuan session chhung hian thla li kalta chhunga sorkarin ordinance a lo pass tawhte chu ngaihtuah an ni dawn tih an sawi. Congress party chuan House pahniha hruaitu, Venkaiah Naidu leh Om Birla-te hnenah hripui leng mek avangin session neih turah MP-te chu rorel inkhawmah a hmun kal kher loa online hmanga an tel phalsak turin an ngen. 

Congress party hruaitu hlun P Chidambaram chuan Rajya Sabha bikah pawh member 245 te bakah officer, staff leh security mi 300 dawnte hmun khatah an awmkhawm chuan hri darh tur laka inven a harsa dawn hle tih sawiin, virtual participation phalsak turin a ngen bawk.