Criminal law thar hnuaia thubuai hmasa ber MP-ah ziak lut

Criminal law thar pathum, Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) chu nimin aṭang khan ram pumah hman ṭan a ni ta. He dan thar hnuaia thubuai hmasa ber chu nimin vek han Madhya Pradesh-a Gwalior-ah ziah luh a ni bawk.

Union home minister Amit Shah chuan British hun laia India ram dan siamte chu an hun a tawp ta a, India mite rilru puthmang hming zawkin thlak a ni, a ti. A taka kal chhoh pui a nih hunah chuan khawvel huap pawhin tunlai hun mil dan ṭha ber zinga mi a ni ang, a ti. "Inhremna pek ngawt ṭhin chu dik taka rorelnain a thlak ang a, thubuaite pawh tikhawtlai loin rang taka ngaihtuah a ni ang. A hma chuan police-te dikna chanvo chauh humhim sak a ni ṭhin a, tunah c huan a tuartu, victim leh complaint thehlut tute dikna chanvo pawh vawnhim sak an ni tawh dawn a ni," tiin nimin press conference a neihah a sawi.

Home Minister chuan dan thar hman tur chungchang zirtirtu, master trainer 12,000 chuang an awm a, heng mite hian ram chhunga police nuai 22.5 chuangte an zirtir dawn tih a sawi. Criminal justice law thar hian pawikhawihna thleng ṭhin pawh a titlemin, conviction rate pawh 90% vel a awm tawh dawn a ni, a ti.

Criminal law thar hnuaia thubuai hmasa ber chu nimin kha chhun dar 12:10 ah khan Gwalior, Madhya Pradesh-ah motorcycle ruk bo chungchangah ziah luh a ni.