'BJP inlulinna hun a tawp tawh' - Mallikarjun Kharge

Congress party president leh Rajya Sabha-a leader of opposition, Mallikarjun Kharge chuan nimina Rajya Sabha rorel inkhawmah rorellai BJP leh prime minister Narendra Modi chu na takin a bei.

Kharge chuan NEET-UG exam buaina leh, eptu pawl hruatute man an nih chungchangah PM leh a kaihhruai party chu beiin, "PM Modi hian India tan zahna a thlen a ni. Modi a awm chuan engkim a tih theih tiin an sawi ṭhin a, mahse 2024 Lok Sabha inthlan khan BJP inlulinna chu a titawp tawh a ni," a ti. He thu hi nimina President Droupadi Murmu-in Parliament joint sitting hmaa a thusawi chungchanga Motion of Thanks sawi honaah a sawi a ni.

Congress President chuan President thusawiah khan ram tana hmathlir leh kaihhruaina ṭha tak a awm lo a, rorellai party chu a thu chauha hmasawnna thlentu, a taka hna thawk tak tak lo niin a puh. Parliament-a President thusawiah khan mi rethei, Dalit leh hnam leh sakhaw tlem zawkte chungchang sawilan a awm lo, a ti. Prime Minister Modi chuan tun thlengin hun rei tak tualchhung buaina thlen tawhna, Manipur pawh a la tlawh lo tih a sawi bawk.

Kharge chuan Rajya Sabha chairman hnenah Mahatma Gandhi leh BR Ambedkar limte chu an awmna hmun ngaia dah let turin a ngen bawk.

Nimina Rajya Sabha rorel inkhawmah hian eptu member-te chuan NEET buaina chungchang sawiho an phut ve bawk a, House laiah an chhuak khawm bawk a ni.