India leh Pakistan-in an mi tang list inpe

India leh Pakistan chuan nimin khan an ram mi an in man sak, jail-a tang mek list an in pe.

India in list a pekah hian India rama Pakistan mi tang mek mi 452 hming tarlangin, an zinga mi 366 chu civil mi niin sangha mantu 86 an tel bawk. Pakistan list-ah hian Pakistan rama India mi tang mek mi 254 hming tarlan a ni ve bawk a, an zinga mi 43 chu civil mi niin, sangha mantu mi 211 an tel.

Ram pahnihte hian Agreement on Consular Access 2008 hnuaiah kum tinin ṭum hnih, January 1 leh July 1-ah mi tang list hi an inpe tawn ṭhin a ni.

India chuan Pakistan rama civil mi tang mekte bakah, sangha mantute pawh an lawng nena chhuah vek turin a ngen. Ministry of External Affairs (MEA) chuan, Pakistan ram an tan hun tlak tawh, India mi, sangha mantu leh civil mi 185 te chhuah a, India rama rawn thawn turin a ngen an ni.

Kum 2014 aṭangin Pakistan rama tang, India civil mi 71 leh sangha mantu 2,639 chu India rama rawn thawn kir an ni tawh a ni. Nikum khan sangha mantu 478 leh civil mi 13 chu an tan hun tlakin an rawn kir bawk.