CBI court-ah Lalu-a a inlan

Rashtriya Janata Dal (RJD) hotu Lalu Prasad Yadav chu ran chaw man, cheng vaibelchhe 37.7 tihchingpen thubuaiah nimin khan Ranchi-a special CBI court-ah a inlan.

June 2 khan court chuan he thubuai kaihhnawihah hian mi 38 chu a lo ko tawh bawk a ni.

Lalu Yadav hi ran chaw man tihchingpen thubuaiah hian kum 2013 October thla khan thiam loh chantirin, kum nga tang tura hrem a ni a, tunah hian bail-in a chhuak mek a ni.

Ran chaw man tihchingpen chungchang hi Bihar-a Lalu Yadav a chief minister lai, kum 1990-1997 inkara thleng a ni. Central-in ran chaw man tura a pek sum tam tham tak chu dawt hmangin lakchhuah a ni a, he thilah hian politician leh sorkar officer lian eng emaw zat inhnamhnawiha puh an ni.

Kum 2013, October 3 khan special CBI court chuan ran chaw man tihchingpen thubuaiah hian Lalu chu thiam loh chantirin, kum nga tang turin a hrem. Hei vang hian Parliament member a nihna pawh paihsak nghal a ni a, kum 11 chhung inthlana chuh thei lo tura hrem a ni bawk.

Lalu Yadav bakahhian politician hlun paruk leh IAS officer pali chu Chaibasa treasury aṭanga dik lo taka sum la chhuakah puhin thiam loh chantir an ni.

Hetihlai hian he thubuai kaihhnawihna animal and fisheries resources department file pawimawhte chu Patna aṭangin a bo nia sawi a ni. Union Minister leh BJP MP Rajiv Pratap Rudy chuan hei hi Bihar Chief Minister Nitish Kumar'n a thawhpui, Lalu Yadav-a chu a tihsual lak aṭanga a fihlim theihna tura a tih tir niin a puh.