Kum hnih chhungin Damdawiin khum 6,000-a tihpun tum

Sorkar laipui chuan damlo harsatna tawh ṭhin pakhat phuhrukna kawng khat atan kum hnih chhungin Damdawiin hrang hrangah khum 6,000 chuang dah belh a tum a, hei bakah hian cancer care hospital thar din a tum bawk. Hemi hma hian state eng emaw zatah All India Institute of Medical Sciences (AIIMS) centre din thar a nih tur thu a lo puang tawh bawk.

Khum dah belh tumna hi hospital lar bikahte a ni a, heng zingah hian New Delhi-a AIIMS, Ram Manohar Lohia (RML), Safdarjung leh Lady Hardinge Hospital-te a ni. Hengte bakah hian Postgraduate Institute of Medical Education and Research (PGI), Chandigarh leh Jawaharlal Institute of Postgraduate Medical Education and Research (JIPMER) bakah Puducherry-ah pawh kum 2018-19 hian khum dalh belh a tum bawk a ni.

Senior official chuan, centre hrang hrangah hian damlo an tam chhoh zel avangin damlo tam zawkten public health institute-a man tlawm zawka enkawlna an dawn theihna turin he ruahmanna hi siam a nih thu a sawi. Private hospital pantu hi an tam zawk a, mahse inenkawlna man hi AIIMS, RML leh Safdarjung Hospital te aiin a sang hle zawk a ni. Mahse sorkar hospital-te hian khum an indaih tawk loh avangin a pan tumtu tan pawh hun rei tak nghah te a ngai ṭhin a ni. Sorkar chuan Delhi AIIMS OPD ah hian nitin damlo 30,000-40,000 inkar in entir an awm ṭhin niin a sawi.

AIIMS tihlenna tumnaah hian department hrang hrang telh an ni a, sorkar laipui chuan he hospital tihlenna tur atan hian cheng vaibelchhe 1,500 vel leh, Safdarjung Hospital tihlenna atan cheng vaibelchhe 1,300 a ruahman dawn nia sawi a ni bawk. Ward hrang hrangh khum dahbelh a ni ang a, super specialty care, emergency leh operatioan theatre te pawh tihlen tum a ni bawk.