Gulberg thubuaia thiam loh changte hremna puan hun sawn

Kum 2002, February 28-a Gulberg Society, Gujarat-a intualvuakna rapthlak tak thlenga inhnamhnawih, mi 24 thiam loh chantir te hremna pek tur puan hun chu court chuan a sawn a, tunkar Zirtawpni hian puan a ni ang.

Court-a an chungthu ngaihtuahnaah special public prosecutor leh Supreme Court-in pawikhawihna thleng chungchang chhui tura a ruat, Special Investigation Team (SIT) counsel, RC Kodekar chuan court hnenah hian thiam loh chantir mi 24-te hi damchhung tantir emaw, thi tura hremna emaw pe turin a phut.

RC Kodekar chuan mi 24-te hi IPC section 149 hnuaiah thiam loh chantir an nih thu sawiin, an phu ang hremna an dawng ngei tur a ni, a ti.

Gulberg Society beih a nih lai hian Narendra Modi chu Gujarat Chief Minister a ni a, mi 400 vel pungkhawm chuan Ahmedabad khaw laili laia awm, Gulberg Society hi pawng beihin he hmuna cheng leh himna zawnga tlan lut mi 58 zet an that a, an zingah hian Congress MP hlui Ehsan Jafri pawh a tel.

Kodekar chuan society beitu mipuite chetdan hi a rawngin mihring tihawma mawi lo khawpin an che a ni a ti a, an mi thahte ruangte chu an hal a, hmeichhia leh naupangte lakah pawh zahngaihna an lantir lo a ni tiin, an pawikhawih rapthlak dan ngaihtuahin hremna na lua a awm thei lo a ni, a ti.

Mipuite kut tuar thite aiawha ding, SM Vora pawhin thiam loh chantirte hi hremna na thei ang ber pek a phut bawk.