Rahul-an Punjab-a rally huaihawt telpui

Punjab state-a dan loa damdawia sumdawnna hluar zel duh lohna lantirin nimin khan Congress party chuan rally an huaihawt a, party vice president Rahul Gandhi-an a telpui.

Rahul Gandhi chuan Punjab-a Akali Dal kaihhruai sorkar chuan dan kalha damdawi hmanga sumdawnna chu a tihluar a ni tiin, nakkum kumtir state assembly inthlan neih turah Congress party chu thlan tlin an nih chuan damdawi vanga buaina hi thla khat chhunga an chinfel theih tur thu a sawi.

Gandhi chuan, "Sorkar mi pawimawhte hian dan loa damdawi zuarte hi an lo hlawkpui avangin an titawp duh lo a ni. He buaina hi police-te kuta pein, hna thawk turin zalenna pe sela, hetianga police kuta hlan a nih chuan kar li chhung lekin he buaina hi a fel thei mai dawn a ni" a ti.

Congress hruaitu chuan Prime Minister Narendra Modi pawh a bei tel nghal a, "PM hian sumdawnna awlsam zawka tih theih dante a sawi ṭhin a, Punjab-ah chuan damdawi hmanga sumdawn hi awlsam takin a tih theih a ni" a ti. Punjab-a rorellai, Akali Dal leh BJP-te chu Bollywood film-a Punjab state-a damdawi hmansualna a hluar dan tarlanna, 'Usta Punjab' chhuah khap chungchangah an ti dik lo niin a puh. He film hian state dinhmun dik tak a tarlan avangin tihchhuah an duh lo a ni, a ti.