House-a a thusawi paih ṭhen chungchangah Rahul-a'n LS Speaker lehkha a thawn

Congress party hruaitu leh Lok Sabha-a leader of opposition, Rahul Gandhi chuan Thawhṭannia President thusawi chungchanga motion of thanks debate neihnaah a thusawi paih ṭhen a nih chungchangah Lok Sabha Speaker Om Birla lehkha thawnin, a thusawi paih ṭhen chu dah let leh turin a ti.

Speaker hnena lehkha a thawnah, Gandhi chuan Speaker-in record-naah thusawi ṭhenkhat paih ṭhen tura thuneihna a neih chu a hria a, mahse he thuneihna hi Lok Sabha Rules of Procedure and Conduct of Business Rules 380-a tarlanah chauh a hmang tur a ni, a ti. Hetih laia debate-a a thusawi paih ṭhensak a ni ringawt chu mak a ti hle tih a sawi a, heng a paihsakte hi Rule 380 in a huam lohte a nih thu a tarlang.

Lok Sabha-a Rahul Gandhi thusawi an paihsak zingah hian prime minister Narendra Modi leh BJP bakah, RSS chungchang a sawina a tel. Congress party hruaitu hian BJP leh RSS chu tharum thawhna lam leh inhuatna lam zirtira tipunluntuah a puh a ni. NEET medical entrance test-a thil fel tawk lo awm nia sawi a sawi chhuah leh, Agnipath military recruitment scheme chungchanga a sawina pawh record aṭangin paihsak a ni a, sumdawng lian Adani leh Ambani te chungchang a sawina pawh paih tel a ni bawk.

Gandhi chuan MP tinte chuan House-ah ram mipui kaihhnawih thil sawi turin dikna chanvo an nei vek a ni tiin, hetiang bawk hian ani pawhin a dikna chanvo neih ang ngeiin ram mipuite tan thu a sawi a ni, a ti. Hetianga a thusawi paih ṭhensak a ni chu parliamentary democracy kalphung kalh a ni tiin, inhuatna chawk chhuak thei zawnga nasa taka thusawitu, BJP minister Anurag Thakur thusawi zinga thumal pakhat chauh paihsak a ni leh si chu mak a ti hle tih a sawi bawk.

"Modi-a kaihhruai khawvelah chuan thudik tak pawh paih ṭhen theih a ni. Mahse a nihna dik takah chuan thudik hi paih bo theih a ni ngai lo. Ka sawi tur tak ka sawi a, chu chu thu dik ka sawi a ni. An duh danin, an duh zat zat an lo paih ṭhen pawh a ni thei, mahse thudik chu thudik a ni reng ang," tiin Gandhi chuan nimina Lok Sabha session neih hmaa chanchin thar lakhawmtuten an kawmnaah a sawi a ni.