Sakhaw danga inlette lakluhna tur hun siam ṭhin tihtawp duh

Allahabad High Court chuan sakhaw dang inlette lakluh hun siam inkhawm buatsaih ṭhin chu titawp a ṭul thu a sawi. Hetianga phalsak an nih zel chuan ram chhunga sakhaw zuitu ngah berte chu zuitu nei tlemah an awm mai dawn a ni, a ti.

He thu hi Uttar Pradesh-a thingtlang khaw pakhata mi, sakhaw danga inlet tura Delhi-a hruaitu nia puha thubuai siamsak, Kailash-a bail dilna ngaihtuahnaah court chuan a sawi a ni.

High Court chuan investigation officer pakhatin statement a siamah, Kailash hian UP-a thingtlang khaw pakhat aṭangin New Delhi-ah mi ṭhenkhat hruaiin, Delhi-ah hian Kristian-ah inlehtir an ni, a ti. FIR thehluttu hi Delhi-a Kailash-a'n a hruai zinga mi,Ramphal-a unaupa Ramkali Parjapati a ni a, a unaupa hi Delhi-a enkawl tura hruaiin an khaw lamah kar khat hnuah a hruai kir leh ang tih a tiam a, mahse a hruai kir leh tak loh avangin police-ah a thlen ta niin a sawi.

Hetih lai hian Kailash ukil, Saket Jaiswal chuan Ramphal hi Kristian-ah inlehtir a ni lo a, Delhi-a Kristiante inkhawmna hmunah a kal ve mai chauh niin a sawi thung.

Court chuan Kailash bail dilna hi a hnawlsak a, an state-ah SC/ST bakah hnam tenau dang, dinhmun rethei zawkte chu Kristian-ah inlehtir an ni fo tih sawiin, hei hi sakhaw inleh khapna dan bawhchhiatna a nih thu a tarlang.